ព័ត៌មានសន្តិសុខ សង្គម និងឧក្រិដ្ឋកម្ម កើតឡើងពីថ្ងៃទី ២០ ដល់ ២៥ វិច្ឆិកា ឆ្នាំ ២០១១

ប្រពន្ធកំណាចចាក់ប្ដី២កាំបិត ព្រោះរឿងលុយលក់ក្របី
ខេត្តកំពង់ធំ ៖ បុរសម្នាក់អាយុ៤៤ឆ្នាំរងរបួសធ្ងន់ដោយប្រពន្ធ អាយុ៣៨ឆ្នាំប្រើអំពើហិង្សាចាក់ ១កាំបិតត្រូវខ្នងនិង១កាំបិតទៀតចំមុខ កាលពីថ្ងៃទី១៩ វិច្ឆិកានៅស្រុកប្រាសាទសំបូរ ដោយស្ត្រីជាប្រពន្ធខឹងប្តីព្រមទទួលលុយកក់ ដោយពុំទាន់បានឯកភាពពីប្រពន្ធ។ប៉ូលិសបានឲ្យដឹងថា ស្ត្រីជាប្រពន្ធកន្លងមកតែងប្រើអំពើហិង្សាលើប្តី ធ្លាប់វាយប្តីនឹងអង្រែ ឬអង្កត់អុស ជាញឹកញាប់ តែជនរងគ្រោះតែងអត់ធ្មត់មិនប្តឹងសមត្ថកិច្ចទេ។បុរសរងគ្រោះ បានឱ្យដឹងថា ពួកគេទាំង២នាក់ប្តីប្រពន្ធបានព្រមព្រៀងគ្នាលក់ក្របី ដើម្បីយកប្រាក់បង់ឱ្យក្រុមហ៊ុននាំកូនរបស់ខ្លួន ទៅធ្វើការនៅប្រទេសថៃ។ ពេលនោះប្រពន្ធកាត់ថ្លៃ៨៥ម៉ឺនរៀល តែឈ្មួញហ៊ានឱ្យថ្លៃតែ៨២ម៉ឺនរៀល ប៉ុណ្ណោះ ។ ដោយសារកំពុងខ្វះលុយ ប្រើប្រាស់ផង ខ្លួនក៏ព្រមលក់ក្នុងតម្លៃ៨២ម៉ឺនរៀល ហើយក៏យល់ព្រមទទួលប្រាក់កក់ពីឈ្មួញចំនួន២ម៉ឺនរៀល។ ស្ត្រីដៃដល់ក៏ប្រាប់ប្តីឱ្យយកលុយកក់ ទៅឱ្យឈ្មួញវិញ ប្តីក៏ចុះពីលើផ្ទះខ្ចីម៉ូតូគេបម្រុងយកលុយ២ម៉ឺនរៀល នេះទៅឱ្យម្ចាស់គេវិញ ស្រាប់តែស្ត្រីជាប្រពន្ធកាន់កូនកាំបិតចុះពីលើផ្ទះចាក់ ទៅលើបុរសជាប្តីតែម្តង។ បន្ទាប់មកក៏រត់គេចខ្លួនបាត់។ បុរសរងគ្រោះ ត្រូវបានគេបញ្ជូនទៅមន្ទីរពេទ្យបង្អែកខេត្ត ដើម្បីសង្គ្រោះ៕
ចាប់ក្មេងទំនើងបង្ហោះម៉ូតូ៣នាក់
ខេត្តកំពង់ឆ្នាំង ៖ ប៉ូលិសចរាចរខេត្តបានបង្ក្រាបក្រុមយុវសិស្សបង្ហោះម៉ូតូ ដោយក្នុងនោះចាប់បានម៉ូតូចំនួន៣គ្រឿង កាលពីទី១៩ វិច្ឆិកា នៅតាមបណ្តោយផ្លូវជាតិលេខ៥។មន្ត្រីប៉ូលិសចរាចរផ្លូវ គោកបានឱ្យដឹងថា ខណៈដែលប៉ូលិសកំពុងអនុវត្តការងារក៏បានឃើញ យុវសិស្សមួយក្រុមជិះម៉ូតូជិត១០គ្រឿង បានឆ្លងកាត់កន្លែងត្រួតពិនិត្យនោះ ពេលឆ្លងផុតកន្លែងប៉ូលិសបានចម្ងាយប្រហែល១០០ម៉ែត្រ ពួកគេបានបង្ហោះម៉ូតូគ្រប់ៗគ្នា ភ្លាមនោះប៉ូលិសក៏បានតាមចាប់បាន៣គ្រឿងដែលពួកគេបាន ទម្លាក់ចោល ហើយក៏បាននាំយកមករក្សាទុកនៅការិយាល័យចរាចរណ៍ផ្លូវគោក ក្នុងនោះមានម៉ូតូ ម៉ាក C125 ចំនួន២គ្រឿង និងម៉ូតូម៉ាកវីវ៉ាចំនួនមួយគ្រឿង។ លោកបន្តទៀតថា លោកនឹងអញ្ជើញអាណាព្យាបាលឬម្ចាស់ម៉ូតូធ្វើការណែនាំ និងផាកពិន័យ៕
ឪពុកចុងតិរច្ឆានរំលោភកូនចុង
ក្រុងប៉ោយប៉ែត ៖ ឪពុកចុងតិរច្ឆានម្នាក់អាយុ២៨ឆ្នាំត្រូវបានកម្លាំងកងរាជ អាវុធហត្ថ ក្រុងប៉ោយប៉ែតចាប់ខ្លួនកាលពី ថ្ងៃទី១៨ វិច្ឆិកា ក្នុងសង្កាត់ប៉ោយប៉ែត ក្រោយពីទទួលពាក្យបណ្តឹងរបស់ម្តាយក្មេងស្រីរងគ្រោះ។បើតាម ការឱ្យដឹងពីសមត្ថកិច្ចបានប្រាប់ថា មុនឈានដល់ការចាប់ខ្លួនជនជាប់ចោទខាងលើ គឺសមត្ថកិច្ចក្រុងបានទទួលពាក្យបណ្តឹងពីស្ត្រីម្នាក់ អាយុ៣៦ឆ្នាំ ត្រូវជាប្រពន្ធជនជាប់ចោទមកប្តឹងថា ឪពុកចុងរូបនោះបានចាប់រំលោភកូនរបស់ខ្លួនជាបន្តបន្ទាប់ រហូតដល់ទៅ៤ដង នាពេលកន្លងមក។ ការបែកធ្លាយករណីរំលោភនេះគឺដោយការធ្វើទារុណកម្ម អុជនឹងភ្លើងបារីទៅលើខ្លួនប្រាណក្មេងស្រីរងគ្រោះឱ្យមាន របួស ហើយពេលម្តាយសង្ស័យ ក៏ធ្វើការសួរនាំ ទើបកូនស្រីប្រាប់ថា ឪពុកចុងធ្វើទារុណកម្មពេលនាងមិនឱ្យរំលោភ។ ទោះជាយ៉ាងណាប៉ូលិសបានបញ្ជូនសំណុំរឿងទៅឱ្យជំនាញនៅទីបញ្ជាការ កងរាជអាវុធហត្ថធ្វើការ ស្រាវជ្រាវ និងសួរនាំបន្ត។ ចំណែកក្មេងស្រីរងគ្រោះត្រូវបានអង្គការសកម្មភាពដើម្បី កុមារយកទៅបីបាច់ថែរក្សា៕
អត់លុយទិញបាយហូបលួចបូមប្រេងយកទៅលក់
រាជធានីភ្នំពេញ ៖ សន្តិសុខ៣នាក់ ត្រូវបានមេការក្រុមហ៊ុនទឹកបរិសុទ្ធឃាត់ខ្លួនកាលពី ថ្ងៃទី២០ វិច្ឆិកា បន្ទាប់ពីក្រុមសន្តិសុខទាំងនោះនាំគ្នាលួចបូមប្រេង ពីរថយន្តដឹកទឹកបរិសុទ្ធយកទៅលក់។បើតាមមន្ត្រីសមត្ថកិច្ច ឱ្យដឹងថា ជនសង្ស័យចំនួន៣នាក់សុទ្ធតែជាសន្តិសុខឯកជនរបស់ទឹកបរិសុទ្ធ ជួលឱ្យយាម បែរជានាំគ្នាលួចបូមប្រេងចេញពី រថយន្តយកទៅលក់ ហើយត្រូវមេការក្រុមហ៊ុនផលិតទឹកបរិសុទ្ធឃើញទាន់ ក៏ឃាត់ខ្លួនប្រគល់ឱ្យសមត្ថកិច្ចតែម្តង។ ទោះបីជាយ៉ាងណា ជនសង្ស័យទាំង៣នាក់ លួចពុំទាន់បាននៅឡើយទេ គឺបានត្រឹមតែបូមចេញដាក់ប៊ីដុងត្រូវគេទាន់ និងត្រូវចាប់ខ្លួន។នៅចំពោះមុខសមត្ថកិច្ចជនសង្ស័យ បានសារភាពថា ខ្លួនបានរៀបចំគម្រោង បូមប្រេងម៉ាស៊ូតចេញពីរថយន្តតាំងពីថ្ងៃ។ លុះយប់ក៏បានធ្វើសកម្មភាពបូមប្រេងចេញ ស្រាប់តែមេការក្រុមហ៊ុនផលិតទឹកបរិសុទ្ធមកទាន់។ ជននេះបានសារភាពទៀតថា ខ្លួនទើបតែទៅយាមក្រុមហ៊ុនទឹកបរិសុទ្ធបានតែ១អាទិត្យដោយ អត់លុយទិញបាយហូបក៏នាំគ្នាលួច ហើយត្រូវគេចាប់បានតែម្តង៕
ទើបតែមកពីទិញត្រីត្រូវចោរប្លន់ទាំងម៉ូតូទាំងត្រី
រាជធានីភ្នំពេញ ៖ អាជីវករលក់ត្រីនៅផ្សារស្ទឹងមានជ័យម្នាក់ត្រូវបានក្រុមចោរ ប្លន់ចំនួន៣នាក់ ប្រដាប់អាវុធខ្លី ជិះម៉ូតូមួយគ្រឿង បានស្ទាក់ផ្លូវភ្ជង់ប្លន់យកម៉ូតូមួយគ្រឿងរួមទាំងត្រី ចំនួន៧៥គីឡូក្រាម បន្ទាប់ពីត្រឡប់មកពីទិញត្រីនៅឯព្រែកព្នៅកាលពីថ្ងៃ ទី១៩ វិច្ឆិកា នៅខណ្ឌឫស្សីកែវ។តាមព័ត៌មានបាន ឱ្យដឹងថា ក្រុមចោរប្លន់មានគ្នា៣នាក់ជិះម៉ូតូមួយគ្រឿង ប្រដាប់ដោយអាវុធខ្លី បានស្ទាក់ផ្លូវអាជីវករលក់ត្រីរូបនោះ ក្បែរស្នងការដ្ឋានហើយក៏ភ្ជង់គំរាមរកបាញ់សម្លាប់ បន្ទាប់មកប្លន់យកម៉ូតូមួយគ្រឿង រួមទាំងត្រី រត់គេចខ្លួនដោយសុវត្ថិភាព។បន្ទាប់ពីត្រូវចោរប្លន់ អាជីវកររូបនោះបានទាក់ទងទៅស្នងការដ្ឋាន បន្ទាប់មកសមត្ថកិច្ចមូលដ្ឋានក៏បានចុះទៅពិនិត្យមើលកន្លែងកើត ហេតុ ៕
រថយន្តក្រុងបើកបុករថយន្តទួរីសរបួសមនុស្ស១៥នាក់
ខេត្តកំពង់ស្ពឺ ៖ កាលពីថ្ងៃទី១៨ វិច្ឆិកា នៅស្រុកភ្នំស្រួច រថយន្ដក្រុងបានប៉ះទង្គិចគ្នា
ជាមួយរថយន្ដទួរីស បណ្ដាលឱ្យរថយន្ដទួរីសខូចខាតស្ទើរទាំងស្រុង និងអ្នកជិះរងរបួស១៥នាក់ ក្នុងនោះធ្ងន់៤នាក់ និងស្រាល១១នាក់ ។ ជនរងគ្រោះត្រូវគេបញ្ជូនទៅព្យាបាលនៅមន្ទីរ ពេទ្យខេត្ដកំពង់ស្ពឺ ដោយឡែកជនរងរបួសធ្ងន់ចំនួន៤នាក់ ក្នុងនោះស្រី៣នាក់ និងប្រុសម្នាក់ជាអ្នកបើកបររថយន្ដទួរីសត្រូវគេបញ្ជូនបន្ដទៅ ព្យាបាលនៅមន្ទីរពេទ្យព្រះកុសុមៈ ។ ជនរងគ្រោះទាំង៤នាក់ដែលសម្រាកព្យាបាលនៅមន្ទីរពេទ្យព្រះកុសុមៈ បាននិយាយប្រហាក់ប្រហែលគ្នាថា រថយន្ដទួរីសដឹកអ្នកដំណើរ១៥នាក់រួមទាំងអ្នកបើកបរ និងព្រូពីស្រែអំបិលឆ្ពោះទៅភ្នំពេញ ខណៈដល់ចំណុចកើតហេតុត្រង់ចំណុចផ្លូវកោង ស្រាប់តែមានរថយន្ដក្រុងមួយគ្រឿងបើកពីភ្នំពេញទៅក្រុងព្រះសីហនុវ៉ា រថយន្ដកុងតឺន័របណ្ដាលឱ្យជ្រុលទៅបុករថយន្ដទួរីសក្រពឹតខាងមុខ ស្ទើរទាំងស្រុង ឯអ្នកជិះក្នុងរថយន្ដប៉ះទង្គិចគ្នាពេញរថយន្ដតែម្ដង ។ ចំណែករថយន្ដក្រុងគ្រាន់តែបែកកញ្ចក់ខាងមុខបន្ដិច ហើយមិនមានអ្នករងរបួសទេ ។រថយន្ដទាំងពីរគ្រឿងត្រូវសមត្ថកិច្ចយកទៅរក្សាទុកនៅស្នងការ ដ្ឋានខេត្ដកំពង់ស្ពឺ ដើម្បីដោះស្រាយ៕
ជើងកាងប្រចាំតំបន់លបស្ទាក់វាយក្រុមស្ទាវមកពីភូមិផ្សេង
រាជធានីភ្នំពេញ ៖ យុវជន៤នាក់រងរបួស ខណៈពេលជិះម៉ូតូត្រឡប់មកពីជូនបងប្អូនទៅផ្ទះនៅផ្សារព្រៃទា វិញ ស្រាប់តែមានក្មេងទំនើងដុះស្លែមួយក្រុមប្រចាំនៅ តំបន់នោះ មានគ្នាពី៨ទៅ១០នាក់ បានរត់ចេញមកកាន់ផ្លែដែកឆាបស្ទុះទៅចាក់លើយុវជន មួយក្រុមមានគ្នា៦នាក់ជិះម៉ូតូ២គ្រឿង បណ្តាលឱ្យរងរបួស៤នាក់ កាលពីថ្ងៃទី២០ វិច្ឆិកា នៅខណ្ឌដង្កោ។ ឪពុករបស់ជនរងគ្រោះម្នាក់ បានឱ្យដឹងថា កូនរបស់គាត់រួមទាំងមិត្ដភក្ដិទាំងអស់៦នាក់ ក្នុងនោះមាន ស្រីម្នាក់បានជិះម៉ូតូ២គ្រឿង ម៉ាកស្មាស់មួយគ្រឿង និងម៉ាកគុបមូលមួយគ្រឿង ដើម្បីជូនបងប្អូនត្រឡប់ទៅផ្ទះនៅផ្សារព្រៃទា ។ ខណៈពេលជិះត្រឡប់មកវិញមកដល់ត្រង់ចំណុចផ្លូវកោងបានបន្ថយល្បឿន ស្រាប់តែមានក្មេងទំនើងមួយក្រុមមានគ្នាពី៨ទៅ១០នាក់ កាន់ផ្លែដែកឆាប និងមានទាំងស្រីម្នាក់ផងដែរបានកាន់ដំបងរត់ចេញដេញចាក់ទៅលើ ក្រុមយុវជនរបស់ខ្លួនដែលកំពុងជិះម៉ូតូបណ្ដាលឱ្យរងរបួស៤ នាក់។ប្រភពព័ត៌មានបានបន្ដទៀតថា ក្រុមក្មេងទំនើងនៅក្នុងតំបន់ព្រៃទានេះ ជាក្រុមក្មេងទំនើងដុះស្លែទៅហើយ ដែលកើតមានយូរយារណាស់មកហើយ ឱ្យតែយប់ស្ងាត់បន្ដិចក្រុមនេះចេញធ្វើសកម្មភាពជារឿយៗ តែងតែបង្កបញ្ហាដល់អ្នកដទៃ ពេលខ្លះគ្រាន់តែវាយនិងចាក់របួសស្នាម ជួនកាលទៀតវាយប្លន់យករបស់របរក៏មានដែរ ហេតុការណ៍នេះតែងតែកើតឡើងជារឿយ មិនដែលឃើញហើយមិនឃើញមានសមត្ថកិច្ចរូបណាចេញទប់ស្កាត់ឡើយ៕
សិស្សវិទ្យាល័យឆក់ខ្សែក
រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួកចំនួន២នាក់ត្រូវនគរបាល ប៉ុស្តិ៍បឹងកក់ទី២ ចាប់ខ្លួនកាលពីថ្ងៃទី២០ វិច្ឆិកា បន្ទាប់ពីជិះម៉ូតូមួយគ្រឿង ធ្វើសកម្មភាពឆក់ខ្សែ.កប្លាទីនបានសម្រេច ហើយជិះម៉ូតូគេចខ្លួន ប៉ុន្តែម៉ូតូដួល ក៏ត្រូវសមត្ថកិច្ចចាប់បានម្នាក់។តាមមន្ត្រីសមត្ថកិច្ច ខណ្ឌទួលគោកបានឱ្យដឹង ថា នៅមុនពេលកើតហេតុ ជនរងគ្រោះម៉ូតូមួយគ្រឿង ធ្វើដំណើរ មកលេងផ្ទះបងប្អូននៅក្រោយសាលាបឋមសិក្សាទួលគោក។ លុះធ្វើដំណើរដល់ផ្លូវលេខ៣១៥ ស្រាប់តែជនសង្ស័យមានគ្នា២នាក់ជិះម៉ូតូមួយគ្រឿង ក្នុងដំណើរស្របគ្នាធ្វើសកម្មភាពឆក់ខ្សែ.កប្លាទីន ហើយជិះម៉ូតូគេចខ្លួន ។ សមត្ថកិច្ចបន្តទៀតថា ខណៈនោះជនរងគ្រោះស្រែកចោរៗ ហើយបើកម៉ូតូដេញតាមពីក្រោយ លុះដល់ចំណុចភ្លើងស្តុបផ្សារមាន់អាំង ជនសង្ស័យវាក់ជាមួយរថយន្ត ក៏ជាន់ហ្វ្រាំងបង្ខំឱ្យដួលម៉ូតូក៏ត្រូវកម្លាំងសមត្ថកិច្ច ប៉ុស្តិ៍ចាប់ខ្លួនបានម្នាក់។ ចំណែកជនង្ស័យម្នាក់ទៀតបានព្យាយាមលើកម៉ូតូជិះគេចខ្លួន បាត់។ ទោះបីជាយ៉ាងណា ខ្សែ.កប្លាទីនបានជ្រុះបាត់ផងដែរ៕
ជនអនាមិកលបបាញ់បុរសវ័យចំណាស់ម្នាក់ស្លាប់នៅមុខផ្ទះតែម្ដង
ខេត្តកំពត ៖ បុរសម្នាក់អាយុ៥៣ឆ្នាំត្រូវបានជនមិនស្គាល់អត្តសញ្ញាណបាញ់ ប្រហារបណ្តាលឱ្យ ស្លាប់នៅលើគ្រែមុខផ្ទះរបស់ខ្លួនកាលពីថ្ងៃទី២០ វិច្ឆិកា នៅស្រុកកំពង់ត្រាច ។តាមការរៀបរាប់របស់ប្រពន្ធជនរងគ្រោះបានឱ្យ ដឹងថា ប្តីគាត់បានដេកនៅលើ គ្រែមុខផ្ទះតែម្នាក់ឯង ចំណែកឯរូបគាត់ជាប្រពន្ធបានចូលដេកក្នុងផ្ទះទៅ ។ ស្ត្រីជាប្រពន្ធបាននិយាយថា ពេលនោះគាត់មិនទាន់ដេកលក់ផង ស្រាប់តែឮស្នូរកាំភ្លើងផ្ទុះ១គ្រាប់យ៉ាងខ្លាំង រូបគាត់ក៏ស្ទុះមកបើកទ្វារចេញហើយស្រែកសួរប្តីពីរឿង ស្នូរគ្រាប់កាំភ្លើងនោះ ប៉ុន្តែប្តីគាត់មិនបានឆ្លើយទេ ។ ដោយសង្ស័យគាត់ក៏ចុះទៅមើលឃើញឈាមទើបដឹងថា ប្តីគាត់ត្រូវគេលួចបាញ់សម្លាប់ គាត់ក៏ស្រែកឆោឡោឡើងផ្អើលអស់អ្នកស្រុក ហើយបន្តិចក្រោយមកឃើញនគរបាល ចុះមកដល់។ ប៉ូលិសបាននិយាយថា ការបាញ់សម្លាប់បុរសអាយុ៥៣ឆ្នាំនេះ ឆ្លងតាមការស្រាវជ្រាវដំបូងអាចនិយាយបានថាជារឿងគំនុំ ។ជនរងគ្រោះត្រូវបានឃាតកបាញ់មួយគ្រាប់បែកប្រអប់មាត់ និងបាក់ដៃឆ្វេងទំនងជាជនរងគ្រោះដេកដាក់ដៃគងថ្ងាស ហើយអ្នកបាញ់នោះគឺយកចុងកាណុងកាំភ្លើងរុញដល់ក្បាលតែម្តងទើបបាញ់ ចំគោលដៅបែបនេះ៕
អង្គរក្សមន្ត្រីជាន់ខ្ពស់យកកាំភ្លើងបាញ់បោះសេរី
រាជធានីភ្នំពេញ ៖  កាលពីថ្ងៃទី ២២ វិច្ឆិកា មានបុរស២ក្រុមកើតទំនាស់វាយទាត់ធាក់គ្នា រហូតឈានដល់ការផ្ទុះអាវុធ២គ្រាប់ពីសំណាក់ភាគីម្ខាងជា អង្គរក្សមន្ត្រីជាន់ខ្ពស់រដ្ឋាករទឹកស្វយ័តរាជធានីភ្នំពេញ ហើយការបាញ់នោះគឺជាការបាញ់រំដោះខ្លួន។ប្រភពព័ត៌មានបាន ឱ្យដឹងថា មុនកើតហេតុ មានបុរស៣នាក់ជិះម៉ូតូ២គ្រឿង ចេញពី កន្លែងផឹកស៊ីមួយពេលទៅដល់មុខផ្ទះសំណាក់១កន្លែង មានភាគីម្ខាងទៀតគ្នាច្រើននាក់ដែលកំពុងឈរលេងនៅមុខផ្ទះ ក៏ស្រែកថា «ឯងស្រវឹងហើយ កុំជិះលឿនពេក» ស្រាប់តែភាគីអ្នកជិះម៉ូតូត្រឡប់ក្រោយចូលមករករឿងភាគី ឈរលេង ដោយដកកាំភ្លើងវាយក្បាលបុរសម្នាក់បែកឈាម ប៉ុន្តែ ក្រុមអ្នកឈរលេងមុខផ្ទះមានគ្នាច្រើនក៏ស្ទុះចូលជួយធ្វើ ឱ្យភាគីអង្គរក្សមន្ត្រីជាន់ខ្ពស់បាញ់២គ្រាប់ ដើម្បីគំរាមគូ ជម្លោះ និងរំដោះខ្លួន។ ពេលនោះនៅសល់អ្នកជិះម៉ូតូឆាលីម្នាក់រត់មិនរួចត្រូវគេព្រួត វាយទ្រមខ្លួន និងចាប់ចងទុកម្តុំរួចហើយទូរស័ព្ទប្តឹងប៉ូលិសឱ្យ យកទៅប៉ុស្តិ៍...ពេលនេះកំពុងកើតមានការប្រឹងប្តល់គ្នា ទៅវិញទៅមក ៕
ចោរលួចម៉ូតូបាត់ខណៈពេលដែលចូលច្រៀងខារ៉ាអូខេ
ខេត្តកំពត ៖ យុវជនទំនើងមួយក្រុមមានគ្នាបីនាក់ បានធ្វើសកម្មភាពលួចកាច់សោយកបានម៉ូតូ មួយគ្រឿង ខណៈម្ចាស់ម៉ូតូអាយុ១៥ឆ្នាំជាសិស្សសាលាចូលច្រៀងខារ៉ាអូខេ នៅក្នុងក្រុងកំពត កើតឡើងកាលពីថ្ងៃទី ១៩ វិច្ឆិកា ប៉ុន្តែទាល់តែម្ចាស់ម៉ូតូចេញពីច្រៀងខារ៉ាអូខេវិញ មិនឃើញម៉ូតូរបស់ខ្លួនទើបដឹងថា ចោរលួច។ដោយបានទទួលពាក្យបណ្តឹងពីជនរងគ្រោះប៉ូលីសបាន ចុះស្រាវជ្រាវកំណត់មុខសញ្ញាជន សង្ស័យ ហើយនៅវេលាម៉ោង៦និង៣០នាទីថ្ងៃទី២៩ វិច្ឆិកា ក៏ឃាត់ខ្លួនជនសង្ស័យបានម្នាក់អាយុ១៩ឆ្នាំក្នុងចំណោមបក្សពួក បីនាក់ ។ ប៉ូលិសបានបន្តទៀតថា ក្រោយពីចាប់ខ្លួន សមត្ថកិច្ចបានសួរនាំពីការលួចម៉ូតូនេះ ហើយជនសង្ស័យសារភាពថា លួចបានម៉ូតូមូយគ្រឿងមែន តែបក្សពួកខ្លួនពីរនាក់ ជាអ្នកយកទៅលាក់។ ក្រោយពីជនសង្ស័យសារភាពនិងប្រាប់ចំណុចដែលពួកគេលាក់ម៉ូតូហើយ នៅវេលាម៉ោង៩យប់ថ្ងៃដដែល សមត្ថកិច្ចបានដឹកជនសង្ស័យទៅដល់ចំណុចដែលប្រាប់ថា លាក់ទុកនោះ ប៉ុន្តែដោយសារព្រៃក្រាស់ពេកមិនអាចរកម៉ូតូឃើញក៏ដឹកជន សង្ស័យមកអធិការដ្ឋានក្រុងវិញ ។ លុះព្រឹកឡើងថ្ងៃទី២០ វិច្ឆិកា សមត្ថកិច្ចបានដឹកជនសង្ស័យទៅម្តងទៀតទើបរកម៉ូតូឃើញ រួចដឹកមកកាន់ស្នងការដ្ឋាននគរបាលខេត្តដើម្បីកសាងសំណុំ រឿងបញ្ជូនទៅសាលាដំបូងខេត្តដោះស្រាយតាមច្បាប់ ។រីឯបក្សពួកពីរនាក់ទៀតដែលរត់គេចខ្លួន សមត្ថកិច្ចបានកំណត់មុខសញ្ញារួចអស់ហើយ រង់ចាំតែសុំដីកាចាប់ខ្លួនប៉ុណ្ណោះ ៕
គ្រាន់តែទាស់ពាក្យសំដីគ្នាសោះក៏ទាញកាំបិតកាប់ដែរ
ខេត្តបន្ទាយមានជ័យ ៖ យុវជនម្នាក់ក្នុងចំណោមបក្សពួក២នាក់ត្រូវនគរបាលស្រុកអូរ ជ្រៅចាប់ខ្លួនបញ្ជូនទៅស្នងការដ្ឋាននគរបាលខេត្តបន្ទាយមានជ័យពី បទប្រើហិង្សា ដោយចេតនាកាលពីថ្ងៃទី១៩ ខែវិច្ឆិកា នៅស្រុកអូរជ្រៅ។ជននោះត្រូវនគរបាលរៀបចំសំណុំរឿង បញ្ជូនទៅសាលាដំបូងខេត្ត។ប៉ូលិសបានឱដឹងថា ជនសង្ស័យ បានកាប់ទៅលើក្រុមម្ខាងទៀត បណ្តាលឲ្យរងរបួសថ្ងាស ចិញ្ចើមខាងឆ្វេង និងកំភួនដៃ និងក្អួតចេញឈាម។ប៉ូលិសបានបន្តទៀតថា នៅចំពោះមុខសមត្ថកិច្ចជនសង្ស័យបាន សារភាពថា គេទាស់ពាក្យសំដីគ្នាជាមួយជនរងគ្រោះ រហូតឈានដល់វាយតប់គ្នាទៅវិញទៅមក។ ស្របពេលនោះមិត្តភក្តិជនរងគ្រោះ បានមកជួយដោយវាយរូបគេត្រូវមួយដៃ។ ឃើញដូច្នេះ មិត្តភក្តិរបស់គេបានរត់ទៅផ្ទះរបស់គេទាញយកកាំបិតមកកាប់ពួកគេ ទាំង២ហើយបន្ទាប់មករត់គេចខ្លួនបាត់។ប៉ូលិសបានរៀបចំសំណុំរឿង បញ្ជូនទៅ សាលាដំបូងខេត្តបន្ទាយមានជ័យ ដើម្បីចាត់ការតាមនីតិវិធីច្បាប់ ៕
រថយន្តទំនើបចងគំនុំជាមួយនឹងខឿនវិមានឯករាជ្យ
រាជធានីភ្នំពេញ ៖ រថយន្តទំនើបមួយគ្រឿង បើកបរដោយក្រុមក្មេងទំនើង បានចាក់កួរបង្អួតស្រីស្នេហ៍ ហើយជ្រុលទៅបុកខឿនវិមានឯករាជ្យ កាលពីថ្ងៃទី២២ វិច្ឆិកាបណ្តាលឱ្យបែកកាង និងបែកស្តូបខឿន។ បន្ទាប់ពីចងកំហឹងខឿនវិមានឯករាជ្យ ហើយរថយន្តមិនបានឈប់ទេ បែរជាព្យាយាមបើករត់ទាំងធ្លាក់កាងរហូតដល់ មហាវិថីព្រះមុនីវង្ស ស្ថិតក្នុងខណ្ឌដូនពេញ ទើបត្រូវបាននគរបាលឃាត់ជាប់រួមទាំងស្រីស្អាតពីរនាក់ផងដែរ ។សមត្ថកិច្ចដែលនៅយាមក្បែរវិមានឯករាជ្យ បានឱ្យដឹងថា មុនពេលកើតហេតុគេឃើញរថយន្តទំនើបមួយគ្រឿងពណ៌ខ្មៅបើកយ៉ាងលឿន លើកំណាត់មហាវិថីព្រះនរោត្តមឆ្ពោះទៅវិមានឯករាជ្យ លុះដល់រង្វង់មូលវិមានឯករាជ្យ ស្រាប់តែរថយន្តនោះទំនងជាអ្នកបើកស្រវឹងធ្លាក់ភ្នែក បានជ្រុលចង្កូតទៅបុកខឿនវិមានឯករាជ្យពេញទំហឹងលាន់ដូចរន្ទះ ហើយរថយន្តបានបើករត់តាមវិថីព្រះសីហនុឆ្ពោះទៅទិសខាងលិចលុះដល់ ផ្លូវកែង មហាវិថីព្រះមុនីវង្សក៏បត់ទៅទិសខាងជើងតែត្រូវបាននគរបាលតាមឃាត់ ជាប់ នៅមុខសណ្ឋាគារមិត្តភាពស្ថិតក្នុងសង្កាត់បឹងរាំង ខណ្ឌ ដូនពេញ និងឃាត់ខ្លួនស្រីទំនើងពីរនាក់នៅក្នុងរថយន្តនោះផងដែរ តែអត្តសញ្ញាណស្រីនោះមិនត្រូវបានគេប្រាប់ឡើយ។សាក្សីបានបញ្ជាក់ថា រថយន្តដែលបុកខឿនវិមានឯករាជ្យនោះបើកបរដោយយុវជនស្ទាវ និងអ្នករួមដំណើរប្រុសម្នាក់ស្រីពីរនាក់ តែនគរបាលឃាត់ខ្លួនបានតែស្រីប៉ុណ្ណោះ ហើយការឃាត់រថយន្តសេរីទំនើបនេះបានគឺដោយសារតែរថយន្ត ទៅមុខលែងរួចស្របពេលសមត្ថកិច្ចតាមប្រកិតផង។ រថយន្តទំនើបនោះត្រូវនគរបាលការិយាល័យចរាចរណ៍ផ្លូវគោកស្ទូចយកទៅទុក នៅ សាលារាជធានីភ្នំពេញ ៕
ស្ត្រី២នាក់ក្នុងចំណោម១០នាក់ត្រូវបានចាប់ខ្លួនពីបទប្រើប្រាស់គ្រឿងញៀន
ខេត្តកំពង់ចាម ៖ ការបង្ក្រាបក្រុមចែកចាយ និងសេពគ្រឿងញៀន បានជាបន្តបន្ទាប់រហូតដល់ទៅ១០នាក់ ក្នុងនោះមានស្ត្រី២នាក់ ដោយរឹបអូសបានថ្នាំញៀនមួយចំនួន ឧបករណ៍វេចខ្ចប់ ឧបករណ៍សេពគ្រឿងញៀន ស្រោមអនាម័យ ទូរស័ព្ទដៃចំនួន៣គ្រឿង កាលពីថ្ងៃទី២១ វិច្ឆិកា ស្ថិតនៅផ្ទះជួលមួយកន្លែងក្នុងក្រុងកំពង់ចាម ហើយក៏បានបញ្ជូនមកកាន់ស្នងការដ្ឋាននគរបាលខេត្ត ដើម្បីសួរនាំរកបក្សពួកបន្តទៀត។ប៉ូលិសបានប្រាប់ឱ្យដឹងថា ប្រជាពលរដ្ឋដែលរស់នៅចំណុចកើតហេតុខាងលើបានរាយការណ៍មកថា បានឃើញមនុស្ស១ក្រុមមានប្រុសមានស្រីកំពុងតែនាំគ្នាសេពគ្រឿង ញៀន នៅក្នុងផ្ទះជួលមួយកន្លែងស្ថិតនៅភូមិ-សង្កាត់ខាងលើ។ ក្រោយពីទទួលព័ត៌មាននេះភ្លាមប៉ូលិសបានធ្វើការចុះបង្រ្កាប ជាបន្ទាន់ ។ជនសង្ស័យទាំងអស់ត្រូវបានបញ្ជូនមកកាន់ស្នងការដ្ឋាននគរបាល ដើម្បីកសាងសំណុំរឿងឡើងទៅតុលាការ ៕
ប្រពន្ធខឹងប្តីពូកែរករឿងពេកកាប់ម្តងឲ្យរៀងចាល
ខេត្តប៉ៃលិន ៖ បុរសម្នាក់អាយុ៤៣ឆ្នាំផឹកស្រាស្រវឹងរាល់ថ្ងៃមិនលោះ និងតែងរករឿងវាយ ប្រពន្ធអាយុ៣៧ឆ្នាំ និងកូនៗ។ ដោយសារទ្រាំមិនបានទើបធ្វើឱ្យស្រ្តីជាប្រពន្ធបានយកកាំបិត កាប់មកលើបុរសជាប្តី ដែលមានមុខរបរជាកម្មករ បណ្តាលឱ្យរងរបួសធ្ងន់ធ្ងរត្រូវបានអ្នកជិតខាង ដឹកមកសង្គ្រោះនៅមន្ទីរពេទ្យបង្អែកខេត្តកាលពី ថ្ងៃទី១៩ វិច្ឆិកា ស្ថិតនៅក្រុងប៉ៃលិន ។ប្រភពបាននិយយាថា ជាក់ស្តែងអំពើហិង្សាដែលបានកើតឡើង បានបង្កឡើងដោយបុរសជាប្តី មកពីផឹកស្រាស្រវឹងបានទាញដំបងមកវាយប្រពន្ធដែលកំពុងអង្គុយនៅក្នុង ផ្ទះ តែស្ត្រីជាប្រពន្ធបានដឹងខ្លួនទាន់ក៏ទាញបានកាំបិតកាប់ មកលើប្តីបណ្តាលឱ្យរងរបួសយ៉ាងធ្ងន់ធ្ងរ ត្រូវក្បាល និងស្មាទាំងសងខាង។ នៅពេលដែលអំពើហិង្សានេះកើតឡើងអ្នកជិតខាងភូមិផងរបងជាមួយមិនហ៊ាន ចូលទៅជួយទេ ព្រោះខ្លាចស្ត្រីជាប្រពន្ធកាប់ចាក់ត្រូវខ្លួន។ ក្រោយមកឃើញបុរសជាប្តីរងរបួសមុតក្បាល និងស្មាទាំងសងខាងហូរឈាមស្រោចពេញខ្លួន។ បន្ទាប់ពីកើតហេតុស្រ្តីជាប្រពន្ធក៏រត់គេចខ្លួនបាត់ទើបមានបង ប្អូននិងអ្នកជិតខាងដឹកបុរសរងគ្រោះតាមម៉ូតូមកសង្គ្រោះជា បន្ទាន់នៅមន្ទីរពេទ្យបង្អែកខេត្ត៕
បុរសម្នាក់ត្រូវបានចាប់ខ្លួនពីបទលាក់ទុកអាវុធខុសច្បាប់
ខេត្តពោធិ៍សាត់ ៖ កាលពីថ្ងៃទី១៧ វិច្ឆិកា សមត្ថកិច្ចបានឃាត់ខ្លួនបុរសម្នាក់អាយុ៤២ឆ្នាំតាមដីកា របស់ ព្រះរាជអាជ្ញារងអមសាលាដំបូងខេត្ត ពីបទលាក់ទុកនិងប្រើប្រាស់អាវុធខុសច្បាប់។ មន្ត្រីប៉ូលិសឱ្យដឹងទៀតថា បន្ទាប់ពីមានសេចក្តីរាយការណ៍ពីប្រជាពលរដ្ឋថា ផ្ទះរបស់ជនជាបចោទខាងលើ មានលាក់ទុកអាវុធក៏បានសុំដីកាពីលោកព្រះរាជអាជ្ញា ដើម្បីឆែកឆេរ។ លុះពេលឆែកឆេរឃើញមានអាវុធអាកាបត់មួយដើម និងគ្រាប់វ៉ាំងដឺឡុងចំនួន៣២គ្រាប់ ក៏ធ្វើការដកហូត និងឃាត់ខ្លួនតែម្តង ដោយចោទប្រកាន់ពីបទលាក់ទុកនិងប្រើប្រាស់អាវុធខុសច្បាប់៕
ទណ្ឌិត២នាក់បានលួចរត់ចេញពីគុក
ខេត្តព្រះវិហារ ៖ ទណ្ឌិត២នាក់បានរត់ចេញពីគុកដែលនេះជារឿងថ្មីមួយទៀតកើតនៅពន្ធ នាគារខេត្តព្រះវិហារ មិនដឹងថា តើអនុរក្សពន្ធនាគារធ្វេសប្រហែសឬមានអ្នកបើកដៃ កាលពីថ្ងៃទី២១ វិច្ឆិកា។បុរសទណ្ឌិតម្នាក់ដែលរត់រួចពីក្នុងពន្ធនាគារខេត្តព្រះ វិហារនោះជាចោរប្លន់ត្រូវបានតុលាការផ្តន្ទាទោសឱ្យជាប់គុក៦ឆ្នាំ រីឯម្នាក់ទៀតជាចោរ លួចកាច់សោម៉ូតូរស់នៅខេត្តកំពង់ចាមត្រូវតុលាការការផ្តន្ទាទោសឱ្យជាប់ គុក៥ឆ្នាំ ។ ព្រះរាជអាជ្ញាសាលាដំបូងខេត្ត បានឱ្យដឹងថា ពេលនេះខាងព្រះរាជអាជ្ញាកំពុងតែត្រួតពិនិត្យកន្លែងកើត ហេតុក្នុងពន្ធនាគារជាមួយអគ្គនាយកនៃអគ្គនាយកដ្ឋានពន្ធនាគារ លើផ្ទៃ ប្រទេសអំពីមូលហេតុនៃការរត់រួចរបស់ទណ្ឌិតយ៉ាងងាយៗបែបនេះដើម្បីធ្វើ ការចោទប្រកាន់ទៅលើមន្រ្តីអនុរក្សនិងឆ្មាំពន្ធនាគារែដលមិនទទួលខុស ត្រូវលើតួនាទីរបស់ខ្លួនទើបបណ្តាលឱ្យមានការរត់រួច៕
សិស្សវិទ្យាល័យត្រូវបានគេស្ទាក់វាយដើម្បីប្លន់ខណៈពេលត្រលប់មកពីផឺកស៊ី
រាជធានីភ្នំពេញ ៖ យុវជន២នាក់ត្រូវជនសង្ស័យ៣នាក់នាំគ្នាព្រួតវាយ ដើម្បីប្លន់យកម៉ូតូ ខណៈពេលជិះត្រឡប់មកពីផឹកស៊ីជាមួយមិត្តភក្តិ ប៉ុន្តែត្រូវបានសមត្ថកិច្ចចម្រុះជួយអន្តរាគមន៍ទាន់ពេលវេលា ក្របួចបានជនសង្ស័យទាំង៣នាក់យកទៅអធិការដ្ឋានខណ្ឌសែនសុខ កាលពីថ្ងៃទី២៣ វិច្ឆិកា នៅខណ្ឌសែនសុខ។ ប្រភពព័ត៌មានពីជនរងគ្រោះជាសិស្សថ្នាក់ទី១២នៃវិទ្យាល័យបាក់ទូក បានឱ្យដឹងថា នៅវេលាម៉ោងខាងលើរូបគេជិះម៉ូតូឌុបមិត្ដភក្ដិម្នាក់ភេទប្រុស អាយុ១៧ឆ្នាំ ស្នាក់នៅភូមិកើតហេតុជាមួយគ្នា រួមទាំងមិត្ដភក្ដិ៤នាក់ទៀត ជិះម៉ូតូ២គ្រឿង ពេលជិះត្រឡប់មកពីក្លឹបវិញ លុះមកដល់ចំណុចកើតហេតុ ម៉ូតូ២គ្រឿងទៀតបានវ៉ាទៅមុខអស់មុន នៅសល់របស់ខ្លួនបើកតាមក្រោយគេ ខណៈនោះស្រាប់តែមានជនសង្ស័យ៣នាក់ជិះម៉ូតូមួយគ្រឿងបាននាំ គ្នាជិះដេញតាមស្ទាក់ព្រួតវាយតែម្តង។ប្រភពពត៌មានដដែលបន្ដទៀត ថា ពេលកំពុងតែប្រតាយប្រតប់គ្នានោះ ស្រាប់តែមានកងកម្លាំងអន្ដរាគមន៍ពិសេសប្រឆាំងភេរវកម្ម និងអង្គភាពអគ្គស្នងការអន្ដរាគមន៍ក្រសួងមហាផ្ទៃបង្ក្រាបគ្រឿងញៀន ស្លៀកពាក់ឯកសណ្ឋានស៊ីវិលជិះម៉ូតូកំពុងដើរល្បាតក៏ប្រទះឃើញហេតុ ការណ៍ដូច្នេះក៏នាំគ្នាឈប់ជួយអន្ដរាគមន៍។ជនសង្ស័យទាំង៣នាក់ វបានសមត្ថកិច្ចនាំយកទៅ រួមជាមួយម៉ូតូ២គ្រឿងផងដែរ ដើម្បីកសាងសំណុំរឿងទៅអធិការដ្ឋានខណ្ឌសែនសុខ៕
ជំលោះរវាងអ្នកជិតខាងរហូតឈានដល់ការបាញ់បោះ
ខេត្តកំពង់ធំ ៖ ខ្មាន់កាំភ្លើងម្នាក់អាយុ៣៨ឆ្នាំត្រូវបានកម្លាំងសមត្ថកិច្ចនៃអធិការ ដ្ឋាន នគរបាលស្រុកបារាយណ៍ឃាត់ខ្លួនភ្លាមៗ បន្ទាប់ពីជនដៃដល់ខាងលើនេះ យកកាំភ្លើងអាកាកាត់ស្វាយបាញ់ទៅលើជនរងគ្រោះម្នាក់អាយុ ៣០ឆ្នាំបណ្ដាលឲ្យរងរបួស ស្រាលកាលពីថ្ងៃទី២១ វិច្ឆិកា នៅ ស្រុកបារាយណ៍ ។ពាក់ព័ន្ធករណីបាញ់បោះខាងលើនេះ ប៉ូលិសបានបញ្ជាក់ថា ការបាញ់បោះនេះជាអំពើគំនុំរវាងជនដៃដល់ និងគ្រួសាររបស់ជនរងគ្រោះដែលមានលំនៅឋានជិតគ្នា។ បើយោងតាមចម្លើយសាក្សី និងការបំភ្លឺរបស់ជនរងគ្រោះបញ្ជាក់ថា មុនពេលមានការផ្ទុះអាវុធជនរងគ្រោះបម្រុងឡើងលើផ្ទះស្រាប់តែជន ដៃ ដល់កាន់កាំភ្លើងមកបាញ់សំដៅជនរងគ្រោះតែម្ដង តែសំណាងល្អគ្រាប់កាំភ្លើងបានប្លាតទៅត្រូវកាំជណ្តើផ្ទះ បណ្ដាលឲ្យចំណាំងឈើខ្ទាតមកមុតពោះ និងទ្រូងរបស់ជនរងគ្រោះ បណ្ដាលឲ្យរបួសស្រាល។ ឃើញដូច្នេះជនរងគ្រោះ និងជនដៃដល់ក៏បានប្រវាយប្រតប់គ្នា ទើបដឹងថា ជនដៃដល់បាញ់ច្រឡំមនុស្ស។ប្រភពបន្តទៀតថា បើតាមការសារភាពរបស់ជនដៃដល់បញ្ជាក់ថា ខ្លួនមានការខឹងសម្បា នឹងបុរសជាបងថ្លៃរបស់ជនរងគ្រោះ ព្រោះបុរសម្នាក់នោះចេះតែលួចរាយការណ៍ពីសកម្មភាពរបស់ ខ្លួនប្រាប់សមត្ថកិច្ច ទើបខ្លួនមានការកុំកួនក៏យកកាំភ្លើងដែលលាក់ទុកជាយូរមកហើយបាញ់ ប្រហារតែ ម្ដង ។ក្រោយធ្វើកំណត់ហេតុរួចនៅថ្ងៃទី២៣ វិច្ឆិកា ជនដៃដល់រួមនឹងវត្ថុតាងត្រូវបានសមត្ថកិច្ចបញ្ជូនទៅសាលាដំបូង ខេត្តតាមនីតិវិធី៕
បារាំងម្នាក់កំពុងជិះម៉ូតូលំហែកាយជាមួយស្រីស្នេហ៏ត្រូវចោរប្លន់
ខេត្តព្រះសីហនុ ៖ ជនសង្ស័យ៣នាក់ ត្រូវ បានកម្លាំងនគបាល និងកម្លាំងកងរាជអាវុធហត្ថស្រុកព្រៃនប់ចាប់ឃាត់ខ្លួន បន្ទាប់ពីជនសង្ស័យទាំងនេះបានធ្វើសកម្មភាពប្លន់ម៉ូតូជនបរទេសពី ក្រុងព្រះសីហនុបម្រុងរត់គេចខ្លួ កើតឡើងកាលពីថ្ងៃទី២៣ វិច្ឆិកា វេលាម៉ោង៣ទៀបភ្លឺនៅតាមបណ្តោយផ្លូវជាតិលេខ៤ នៅស្រុកព្រៃនប់។ប៉ូលិសបានឱ្យដឹងថា ជនសង្ស័យដែលត្រូវបានកម្លាំងសហការចាប់ឃាត់ខ្លួននេះ បានធ្វើសកម្មភាពប្លន់ម៉ូតូមួយគ្រឿង ពីជនបរទេសម្នាក់ភេទប្រុស អាយុ៣២ឆ្នាំ ជនជាតិបារាំង កាលពីថ្ងៃទី២២ វិច្ឆិកា ត្រង់ ក្រុងព្រះសីហនុ ខណៈជនរងគ្រោះកំពុងលំហែកាយជាមួយស្រីម្នាក់៕
សុំគេស្នាក់១យប់ចាប់រំលោភកូនម្ចាស់ផ្ទះអាយុ៦ឆ្នាំ
ខេត្តកំពត ៖ នគរបាលការិយាល័យព្រហ្មទណ្ឌកម្រិតធ្ងន់ខេត្តបានឃាត់ខ្លួនបុរស ម្នាក់ អាយុ៣០ឆ្នាំ នៅស្រុកទឹកឈូ កាលពីថ្ងៃទី២២ វិច្ឆិកា បន្ទាប់ពីបុរសរូបនេះបានចាប់ក្មេងស្រីអាយុ៦ឆ្នាំ រំលោភសេពសន្ថវៈរួចមក ។មន្ត្រីនគរបាលព្រហ្មទណ្ឌកម្រិតធ្ងន់បានឱ្យ ដឹងថា មុនពេលមានការចាប់រំលោភនេះ មានបុរស២នាក់ម្នាក់បាននាំគ្នាមកលេងផ្ទះម្តាយក្មេងស្រី និងបានទិញស្រាហូបរហូតដល់យប់ជ្រៅមិនហ៊ានត្រឡប់ទៅផ្ទះវិញ ក៏សុំម្តាយក្មេងស្រីដេកមួយយប់ ។ លុះដល់ម៉ោង១១យប់ស្រាប់តែជនល្មើសម្នាក់ ដែលដេកលែងជាមួយក្មេងស្រីរងគ្រោះបានបញ្ជាឱ្យក្មេងស្រីនោះលេង ប្រដាប់ភេទរបស់ខ្លួនរហូតតណ្ហាពុះកញ្ជ្រោលខ្លាំងទ្រាំមិន បានក៏ចាប់ក្មេងស្រីឱ្យអង្គុយពីលើប្រដាប់ភេទរបស់ខ្លួន ។ ពេលនោះដោយសារក្មេងស្រីរងគ្រោះឈឺក៏បានស្រែកបង្កការភ្ញាក់ ផ្អើលដល់ម្តាយមកបើកភ្លើងមើលឃើញជនល្មើសម្នាក់នោះ កំពុងស្លៀកខ្យល់ដណ្តប់មេឃក៏បានប្តឹងនគរបាលព្រហ្មទណ្ឌ កម្រិតធ្ងន់ចុះមកដល់កន្លែងកើតហេតុឃាត់ខ្លួនតែម្តង ។ មន្ត្រីនគរបាលបាននាំកុមារីរងគ្រោះទៅធ្វើកោសល្យវិច័យនៅ មន្ទីរពេទ្យខេត្ត ដើម្បីមានឯកសារគ្រប់គ្រាន់សម្រាប់ចោទប្រកាន់ជនសង្ស័យទៅ សាលាដំបូងខេត្ត៕
លួចលាក់ឈើធ្នង់ក្រោមបាវអង្កាមត្រូវបានមេព្រៃឆែកឃើញ
ខេត្តក្រចេះ ៖ ឈើប្រណីតធំៗប្រភេទធ្នង់រាប់សិបកំណាត់ត្រូវឈ្មួញដឹកតាមរថយន្តកូរ៉េ លាក់ក្រោមបាវអង្កាមត្រូវបានមេព្រៃចាប់ឃាត់ និងឆែកឆេររកឃើញ ហើយរឹបអូសទាំងស្រុងបញ្ជូនទៅរក្សាទុកនៅសង្កាត់រដ្ឋបាលព្រៃឈើ ឆ្លូង តាមនីតិវិធីកាលពីយប់ថ្ងៃទី២១ វិច្ឆិកា កម្លាំងរដ្ឋបាលព្រៃឈើបានចាប់ឃាត់រថយន្តកូរ៉េមួយគ្រឿងពណ៌ខៀវ ចំណុះ១តោនកន្លះ គ្មានស្លាកលេខ នៅចំណុច ស្រុកឆ្លូង ខណៈពេលរថយន្តមួយគ្រឿងនេះមានផ្ទុកបាវអង្កាមពេញប្រៀប ដោយមានការសង្ស័យក៏ស្ទាក់ចាប់ឆែកឆេរតែម្តង។ ប្រភពដដែលបានបន្តថា ក្នុងសកម្មភាពចាប់ឃាត់នោះមេព្រៃបានប្រទះឃើញមានផ្ទុកឈើ ប្រណីតប្រភេទធ្នង់មានចំនួន៤០កំណាត់ធំៗជាង៨ម៉ែត្រគូប ដែលឈ្មួញលាក់នៅពីក្រោមបាវអង្កាម និងត្រូវបាននាំយកទៅរក្សាទុកនៅសង្កាត់រដ្ឋបាលព្រៃឈើឆ្លូង ដើម្បីចាត់ការបន្ត។មន្រ្តីជំនាញមិនបានប្រាប់អំពីអត្តសញ្ញាណម្ចាស់ រថយន្តដឹកឈើនេះទេ តែបើតាមប្រភពព័ត៌មានមួយបានឱ្យដឹងថា ទាំងរថយន្ត និងឈើនេះ គឺគេស្គាល់ម្ចាស់ជាមន្ត្រីយោធាខេត្តក្រចេះ និងជាមេឈ្មួញរកស៊ីឈើដ៏ធំមួយដែលតែងតែយកឈ្មោះយោធាមកកាងជំនួញ ដឹកជញ្ជូនឈើរបស់ខ្លួន៕
គ្រាន់តែទំនាស់បន្តិចបន្តួចក៏កាប់សម្លាប់គ្នាដែរ
រាជធានីភ្នំពេញ ៖ កម្មករសំណង់ម្នាក់អាយុ២៥ឆ្នាំត្រូវកម្មករដូចគ្នាចំនួន២នាក់ បានព្រួតគ្នាវាយ និងកាប់បណ្តាលឱ្យស្លាប់បាត់បង់ជីវិតនៅនឹងកន្លែងស្នាក់នៅ បន្ទាប់ពីផឹកស៊ីស្រវឹងមានទំនាស់គ្នារឿងគេបិតភ្លើង ។ទោះបីជាយ៉ាងណា ជនដៃដល់ត្រូវបានសន្តិសុខ និង កម្មករនាំគ្នាចាប់បាន២នាក់ ភ្លាមៗ កាលពីថ្ងៃទី២៣ ខែវិច្ឆិកា នៅខណ្ឌឫស្សីកែវ ។ ជនរងគ្រោះដែលបានស្លាប់ ត្រូវបានជនដៃដល់វាយ និងកាប់ចំមុខស្ទើរសុស ហើយក៏ធ្លាក់ពីលើគ្រែស្លាប់យ៉ាងអាណោចអាធ័ម ។ តាមព័ត៌មានឱ្យដឹងថានៅវេលាយប់ថ្ងៃទី២២ ខែវិច្ឆិកា ជនរងគ្រោះរួមទាំងកម្មករ ២នាក់បាននាំគ្នាផឹកស៊ីនៅលើគ្រែ ។ លុះមកដល់ម៉ោង៩យប់សន្តិសុខក៏បានបិទភ្លើង ហើយជនរងគ្រោះរួមទាំងកម្មករម្នាក់ទៀតប្រាប់កុំឱ្យមាត់ដល់ម៉ោង គេបិទភ្លើងហើយ ។ ខណៈទំនាស់គ្នានេះជនរងគ្រោះក៏ចូលទៅដេកស្រាប់តែមិត្តភក្តិ២នាក់ទៀត មិនឱ្យដេក ហើយក៏យកដំបង និង កាំបិតនាំគ្នា តាមទៅវាយជនរងគ្រោះរហូតដល់ស្លាប់ ។ បន្ទាប់ពីវាយហើយជនដៃដល់ក៏បានរត់គេចខ្លួន តែត្រូវបានសនិ្តសុខ និងកម្មករដេញចាប់បានទាំង
២នាក់់ ៕
ប៉ូលិសរាជធានីចាប់បានចោរប្លន់យ៉ាងសកម្ម២នាក់
រាជធានីភ្នំពេញ ៖ ក្រុមចោរប្លន់យ៉ាងសកម្មនៅក្នុងរាជធានីភ្នំពេញ ត្រូវបានកម្លាំងព្រហ្មទណ្ឌកម្រិតធ្ងន់នៃស្នងការដ្ឋាននគរបាល រាជធានីភ្នំពេញ បង្ក្រាបបាន២នាក់ និងដកហូតបានម៉ូតូ១គ្រឿង ដែលជិះធ្វើសកម្មភាព កាលពី ថ្ងៃទី២៤ វិច្ឆិកា នៅពេលដែលក្រុមនោះចេញធ្វើសកម្មភាពដោយជិះម៉ូតូរបស់រង គ្រោះ ដែលប្លន់បានកន្លងមកប្រុងធ្វើសកម្មភាពប្លន់ទៀតនៅក្នុង ខណ្ឌចំការមន ។ បន្ទាប់ពីចាប់ខ្លួនសមត្ថកិច្ចសហការជាមួយមន្ត្រីតុលាការចុះ ទៅឆែកឆេរលំនៅឋានក្នុងសង្កាត់បឹងសាឡាង ខណ្ឌទួលគោក ។ តាមព័ត៌មានឱ្យដឹងថា ក្រុមនេះបានធ្វើសកម្មភាពប្លន់ តែនៅវេលាទៀបភ្លឺ ហើយនៅមុនពេលចាប់ខ្លួនជនសង្ស័យមានគ្នា៤នាក់ ជិះម៉ូតូ២គ្រឿង ប្រដាប់ដោយអាវុធខ្លីម៉ាក K59 មួយដើម ហើយត្រូវកម្លាំងព្រហ្មទណ្ឌកម្រិតធ្ងន់ល្បាតប្រទះឃើញជិះម៉ូតូ របស់ជនរងគ្រោះដែលត្រួវក្រុមនោះធ្វើសកម្មភាពកន្លងមកក៏ដេញ ចាប់បាន២នាក់។តាមការសារភាពឱ្យដឹងថា ក៏ពួកគេធ្លាប់ប្លន់៤លើកមកហើយ និងមានបក្សពួកចំនួន៦នាក់ ឯម៉ូតូខាងលើជារបស់ជនរងគ្រោះដែលពួកគេប្លន់បានកន្លងមក ៕
ព័ត៌មានសន្តិសុខសង្គម និងឧក្រិដ្ឋកម្ម ដែលកើតឡើងពីថ្ងៃទី ២០ ដល់ ២៥ វិច្ឆិកា ឆ្នាំ ២០១១

Pages

Welcome to iblet.blogspot.com

Labels

Saturday, November 26, 2011